Дэлхийн олон оронд инфляцийн түвшин нэмэгдсэн, ажиллах хүчний хомсдол нүүрлэсэн, агаарын тээвэрт тулгараад буй асуудлууд зэргээс шалтгаалаад аялал жуулчлалын салбар амаргүй цаг үеийг туулж байна. Аялагчид аяллын зардлын өсөлттэй удаан хугацаанд тэмцэж байгааг "Yahoo Finance" мэдээлжээ. NEWS агентлаг энэ удаагийн "Дэлхийн эдийн засаг" буландаа аялал жуулчлалын салбарын зардлын талаар мэдээллийг хүргэж байна.

АНУ-ын хот хоорондын нислэгийн дундаж үнэ 2022 оны тав, зургадугаар сард 320 ам.доллараас бага байжээ. Энэ нь тухайн үедээ онгоцны тийзний үнэ дээд цэгтээ хүрсэн тохиолдол. АНУ-ын Хөдөлмөрийн статистикийн товчооны мэдээлснээр өдгөө онгоцны тийзний үнэ дунджаар 270 ам.долларт хүрч харьцангуй буурчээ. Тэгэхээр аяллын нэмэлт зардал үнэндээ өөр эх сурвалжаас гаралтай байж магадгүйг аяллын тэргүүлэгч цахим хуудас "Points Guy"-ын үүсгэн байгуулагч Брайан Келли хэлсэн байна. "Иймэрхүү статистик мэдээг би хошин шог л гэж хардаг. Яг том зургаар нь харвал нислэгийн үнэнд тийм мега өсөлт харагдахгүй байна. Харин тансаг зэрэглэлийн зочид буудлуудад үнийн өсөлт ажиглагдаж байна. 1000 ам.доллартай байхад Италийн шилдэг зочид буудал "Four seasons"-д хонодог байсан. Гэтэл одоо тансаг зочид буудлуудын үнэ 2000 ам.доллар, зарим нь бүр 3000 ам.доллар хүрч байна. Энэ бол үнэхээр галзуурал.

Орчин цагт тансаг зэрэглэлийн зочид буудалд хонохын оронд дарвуулт онгоц түрээслэх нь илүү хямд болжээ" гэжээ.

Түүний таамаглаж буйгаар энэ онд онгоцны тийзний үнэ өнгөрсөн жилийнхтэйгээ ойролцоо байна. Гэхдээ зургаа, долдугаар сард Олимпийн наадамтай холбоотойгоор онгоцны тийзний үнэ өсөх магадлалтай. Олон жилийн дунджаас харахад наймдугаар сард ихэвчлэн үнэтэй байдаг аж. Энэ оны хувьд арай нааштай таамаглал харагдаж байгаа гэв.

Нью-Йоркоос Итали хүртэл "British Airways"-ын нэгдүгээр ангиллаар нисэхэд ойролцоогоор 4000 ам.доллар байгаа аж. Харин өнгөрсөн зун энэ чиглэлд 5000-7000 ам.долларын тасалбар худалдаж авч байжээ. Тиймээс энэ зун өмнөх оны үнийг давахгүй гэж таамаглаж байна.

Аялагчид илүү хямд үнээр аялъя гэвэл зээлийн картын урамшуулал, "Google Flights Explore" табыг ашиглах, нээлттэй суудалтай нислэгийн сүүлийн минутын хямдрал зэрэг зардал хэмнэх тактикуудыг судлахыг "Points Guy" зөвлөж байна.

Хүмүүс зуны аялалдаа бэлдэх зуур агаарын тээврийн салбар ч бас олон сорилттой тулгарч байна. Жишээлбэл, орлогын улирал эхэлж байгаа хэдий ч "Boeing" компанийн асуудал дуусаагүй л байсаар. Тус компанийн "737 Max 9" тийрэлтэт онгоц нэгдүгээр сард "Alaska Airlines"-ын нислэгийн үед осолдсон нь олон нийтийн санаа зовнилыг төрүүлээд буй. Гэсэн хэдий ч агаарын тээврийн компаниудын хохирол харьцангуй хязгаарлагдмал хэмжээнд байгааг мэргэжилтнүүд хэлж байна.

"United Airlines"-ын хувьцааны ханш л гэхэд өнгөрсөн долоо хоногт 2024 оны хамгийн дээд цэгтээ хүрч, 52 ам.доллар дөхжээ. "Alaska Air Group" ч бас энэ оны нэгдүгээр улиралд таамаглаж байснаас илүү бага алдагдал хүлээсэн байна.

Эх сурвалж: YAHOO FINANCE