Олон улсын валютын сан, Дэлхийн банкны жилийн уулзалт аравдугаар сарын 14-18-нд АНУ-ын Вашингтон хотноо болж, Монголбанкны ерөнхийлөгч тэргүүтэй удирдлагууд оролцсон. Энэ үеэр олон улсад нэр хүндтэй “Global Finance” сэтгүүлийн зүгээс 2025 оны “Central Banker Report Cards” тайлангаар шилдэгт багтсан Төв банкны тэргүүнүүдэд үнэлгээний батламжийг нь гардуулан өгжээ.

Монголбанкны ерөнхийлөгч Б.Лхагвасүрэн тус тайлангаар “А-” үнэлгээ авч, дэлхийн шилдэг Төв банкны удирдлагуудын нэгээр шалгарсан. Энэ үеэр батламжаа мөн гардаж авав. “Central banker Report Cards-2025” үнэлгээний дэлгэрэнгүй тайланд "Б.Лхагвасүрэн нь 2019 оноос хойш Монголбанкийг удирдаж буй бөгөөд уул уурхайгаас ихээхэн хамааралтай, цаг уурын таагүй нөхцөлд өртөмтгий Монгол Улсын эдийн засагт тулгарсан сорилтуудыг амжилттай даван туулж ирлээ. Азийн хөгжлийн банкны таамаглалын дагуу уул уурхай болон хөдөө аж ахуйн салбаруудын өсөлт 2025 онд Монгол Улсын эдийн засаг 6.6 хувиар өсөхөд дэмжлэг үзүүлэх төлөвтэй байна. 2025 оны II улирлын байдлаар ДНБ-ий өсөлт 5.6 хувьтай байгаа нь эхний улирлын 2.4 хувийн сулхан өсөлтөөс огцом сэргэсэн үзүүлэлт болж байна. Харин инфляц долдугаар сард 8.1 хувь болж буурсан нь сүүлийн найман сарын хамгийн бага үзүүлэлт болжээ. Энэ нь Монголбанк энэ оны гуравдугаар сард бодлогын хүүг хоёр нэгжээр өсгөж, 12 хувьд хүргэсэн бодлогын үр дүн юм. Цаашид Монголбанк дунд хугацаанд инфляцыг таван хувь хүртэл бууруулахыг зорьж байгаа тул энэ онд бодлогын хүүг дахин бууруулах бодлого баримтлах магадлал бага” гэжээ.

Монголбанкны ерөнхийлөгч Б.Лхагвасүрэн тус тайланд 2024 онд мөн “А-” үнэлгээ авч шилдэг 15 улсын төв банкны тэргүүнээр тодорч байсан юм. Энэ жил дахин үнэлгээгээ баталгаажууллаа. "Central Banker Report Cards" тайланг 1994 оноос хойш жил бүр гаргаж ирсэн. Уг тайланд дэлхийн 100 гаруй улсын төв банкны удирдлагын үйл ажиллагааг дараах шалгуураар үнэлдэг. Үүнд:

- Үндсэн зорилтыг хэрэгжүүлсэн байдал

- Эдийн засгийн өсөлт, санхүүгийн тогтвортой байдлыг хангах үр дүн

- Инфляц болон валютын ханшийн тогтвортой байдлыг хадгалсан

- Төв банкны хараат бус байдлыг хангасан байдал гэсэн дөрвөн шалгуурыг үндэслэн дэлхийн 100 гаруй улсын төв банкны удирдлагуудад “А+”-ээс “F-” хүртэл үнэлгээ өгч, жагсаадаг аж. Энэ жилийн хувьд “Central Banker Report Cards” тайланд дэлхийн 26 улс А+, А, А- үнэлгээ авч, дэлхийн шилдгүүдэд багтжээ. Эдгээрээс 14 улс А- үнэлгээ авсан бөгөөд Европын Төв банкны тэргүүн Кристин Лагарде, Сингапурын Төв банкны Ерөнхийлөгч Чи Дер Жун,, Чехийн Төв банкны тэргүүн Але Мичи зэрэг дэлхийн томоохон төв банкнуудын удирдлагууд багтсан байна.