Монгол Улс 2025 оны эхний 7 сард нийт 152 улстай худалдаа хийжээ. Ингэснээр гадаад худалдааны нийт бараа эргэлт 14.2 тэрбум ам.долларт хүрсэн байна. Үүнээс экспорт 7.8, импорт 6.5 тэрбум ам.долларт хүрсэн аж. Иймээс гадаад худалдааны тэнцэл 1.3 тэрбум ам.долларын ашигтай гарав. Нийт бараа эргэлтийн хэмжээ өмнөх оны мөн үеийнхээс 1.4 тэрбум ам.доллар буюу 9.2 хувиар буурчээ. Экспорт 1.5 тэрбум ам.доллар буюу 16 хувиар буурсан нь нийт бараа эргэлт саарахад голлон нөлөөлсөн байна. Харин импорт 68.9 сая ам.доллароор өсжээ. Гадаад худалдааны тэнцэл ч өмнөх оны мөн үеийнхээс 1.6 тэрбум ам.доллароор буурлаа.

Экспортын хэмжээ 2025 оны эхний 7 сард өмнөх оны мөн үеийнхээс 1.5 тэрбум ам.доллароор буурахад нүүрс 2.4 тэрбум, угаасан ноолуур 200.2, боловсруулаагүй газрын тос 35.5, хонь, ямааны мах 25.9, төмрийн хүдэр, баяжмал 15.5 сая ам.доллароор тус тус буурсан нь голлон нөлөөлжээ. Харин зэсийн хүдэр ба баяжмалын экспорт 1.1 тэрбум, мал амьтны самнасан үс, хялгас 42.6, цайрын хүдэр, баяжмал 31.4 сая ам.доллароор өссөн байна.

Импорт өмнөх оны мөн үеийнхээс 68.9 сая ам.доллароор өсөхөд суудлын автомашин 190.5, тээврийн хэрэгслийн сэлбэг, эд анги 20.1, согтууруулах ундаа 14.7, тунгаар савлагдсан эм 13, гар утас 12.2 сая ам.доллароор тус тус өссөн нь голлон нөлөөлжээ. Харин ачааны автомашины экспорт 72, дизелийн түлшийнх 54.7 сая ам.доллароор буурсан аж.