Багануурын уурхайг түшиглэн байгуулах “Нүүрс химийн цогцолбор” буюу “Хөх нүүрсний үйлдвэр” барих төслийн үйл ажиллагааны хүрээнд Монгол Улсын Шадар сайд С.Амарсайхан, “Эрдэнэс Монгол” нэгдлийн гүйцэтгэх захирал С.Наранцогт, "Эрдэнэс ҮТП" ХХК-ийн гүйцэтгэх захирал Н.Мөнх-Идэр нарын холбогдох хүмүүс тус уурхайд ажиллалаа.

Нийгэм, эдийн засагт өндөр ач холбогдолтой “Хөх нүүрсний үйлдвэр”-ийн ТЭЗҮ хийгдэж байгаа бөгөөд 190 сая ам.долларын хөрөнгө оруулалт шаардагдах тус үйлдвэрийн эхний шатыг 2025-2027 онд барьж ашиглалтад оруулахаар төлөвлөж байна. Цаашид хөх нүүрснээс кальцийн карбид, ацетилин зэрэг дараагийн шатны бүтээгдэхүүн үйлдвэрлэх бөгөөд паркийн хөгжлийн төлөвлөгөөний 3-р шатанд нүүрс хийжүүлэх химийн үйлдвэр байгуулагдана. Ингэснээр паркийн хэмжээнд шинээр 2000 орчим ажлын байр бий болж, жилд 250 сая ам.долларын борлуулалт хийх урьдчилсан тооцоо гарчээ.

Хөх нүүрс нь одоогийн сайжруулсан шахмал түлшнээс 62%-иар бага өртөгтэйн дээр гэр хорооллын айл өрхүүдийн үүсгэж байгаа тоос, тоосонцор, үнс, утааг 60-80%-иар бууруулах боломжтойг мэргэжилтүүд тооцоолжээ. Тодруулбал, жигнэх технологиор үйлдвэрлэх хөх нүүрсийг айл өрхүүдийн хэрэглээнд нэвтрүүлснээр тоосонцор 4 дахин, хүхрийн хүчлийн агууламж 3 дахин, азотын давхар исэл 6 дахин буурах юм. Түүнчлэн, нүүрсийг дулааны аргаар боловсруулах үед ялгарах илүүдэл хийгээр цахилгаан эрчим хүч үйлдвэрлэхээр төлөвлөж байна.

Эх сурвалж. erdenesmongol.mn