“БИД ББСБ” компанийн нээлттэй зах зээлд гаргаж буй 10 тэрбум төгрөгийн санхүүжилт татах “БИД 2.0” захиалгыг эхлүүлэх цан цохих ёслол Санхүүгийн зохицуулах хороонд болов. Нэгж бүр нь 100 мянган төгрөгийн үнэтэй “БИД 2.0” бондын жилийн хүү 18 хувь байх юм. Хугацаа нь хоёр жил агаад хүүгийн төлбөрийг улирал тутам олгох аж.    

Цан цохих ёслолын үеэр “БИД санхүүгийн нэгдэл”-ийн ТУЗ-ийн дарга А.Алтансүх “Энэ мөнгө хэрэглээний зээл болж гарахгүй. Хувиараа хөдөлмөр эрхлэгчдийн бизнесийг дэмжсэн зээл байх болно. Нэг бизнес эрхлэгч дунджаар 10 сая төгрөгийн зээл авдаг. Тэгэхээр 1000 бизнес эрхлэгчийг дэмжсэн хөрөнгө оруулалт байх болно” гэлээ. Тэгвэл тус бондыг олон нийтэд арилжих андеррайтераар ажилласан “Өлзий энд ко капитал” ҮЦК-ийн захирал Б.Өлзийбаяр “Олон хөрөнгө оруулагч “БИД 2.0” бондыг сонирхож байна. Захиалга нэлээд давж биелэх магадлалтай байгаа” хэмээв.