“Монголын хөрөнгийн бирж”-ийн Үнэт цаасны бүртгэлээс хасагдах нөхцөл үүссэн "Азык", “Гурил”, “Төмрийн завод”, “Алтай нэгдэл”, “Монгол шевро” хувьцаат компаниуд хугацаатай мэдэгдэл хүргүүлжээ. Мэдэгдэлд “Холбогдох журам, гэрээгээр хүлээсэн үүргээ биелүүлж, журмын шалгуур, шаардлагыг хангаж ажиллахтай холбоотой цаашид хэрэгжүүлэх арга хэмжээний талаар 2026 оны есдүгээр сарын 25-ны дотор эргэн мэдэгдэхийг анхааруулж байна. Заасан хугацаанд хариу мэдэгдэж, арга хэмжээ аваагүй тохиолдолд дээрх компаниудыг “Монголын хөрөнгийн бирж” ХК-ийн “Үнэт цаасны бүртгэлийн журам”-ын дагуу бүртгэлээс хасах болохыг үүгээр мэдэгдэж байна” гэжээ.

Монголын хөрөнгийн биржид нийт 162 компани бүртгэлтэй байгаа. Эдгээрийг гурван ангилалд бүртгэдэг. Хувьцааны төвлөрөл ихтэй, хөрвөх чадвар муу, үүргийн хэрэгжилтээ биелүүлдэггүй 94 хувьцаат компанийг гуравдугаар ангилалд бүртгэсэн. Дээрх нь Монголын хөрөнгийн биржийн гуравдугаар ангилалд бүртгэлтэй компаниуд юм.

Монгол Улсын Ерөнхий сайд Н.Учрал НҮБ-ын Хүнс, хөдөө аж ахуйн байгууллагын Ерөнхий захирлын орлогч, хатагтай Бет Бекдолыг хүлээн авч уулзаж, хамтын ажиллагааны чиглэлээр санал солилцлоо. Ерөнхий сайд Н.Учрал, Монгол Улс 1973 онд НҮБ-ын ХХААБ-д элссэн цагаасаа хойш тус байгууллагын эрхэм зорилго, үйл ажиллагааг тууштай дэмжсээр ирсэн. Өнөөдөр ч Монгол Улс НҮБ-ын Тогтвортой хөгжлийн зорилтууд, тэр дундаа ядуурлыг бууруулах, өлсгөлөнг зогсоох зорилтуудыг хэрэгжүүлэхэд чиглэсэн бодлого, үйл ажиллагаа, санаачилгуудыг үргэлжлүүлэн дэмжиж, найдвартай бөгөөд идэвхтэй түнш хэвээр байна. Монгол Улс, НҮБ-ын ХХААБ хоорондын хамтын ажиллагааг идэвхжүүлэхэд эрхэм хүндэт Ерөнхий захирал Др.Чю Дониу-ийн 2024 онд Монгол Улсад хийсэн айлчлал болон Монгол Улсын Ерөнхийлөгч У.Хүрэлсүхийн Бүгд Найрамдах Итали Улс дахь төрийн айлчлал, мөн үеэр НҮБ-ын ХХААБ-д зочилсон нь хамтын ажиллагааг улам бэхжүүлж, цаашид шинэ түвшинд хүргэхэд томоохон түлхэц болсныг онцлов.

НҮБ-ын Хүнс, хөдөө аж ахуйн байгууллагын Ерөнхий захирлын орлогч, хатагтай Бет Бекдол, “COP 17” бага хуралд Монгол Улсын Засгийн газрын манлайлалд талархал илэрхийлж, бэлчээрийн асуудлаарх олон улсын хамтын ажиллагааг үргэлжлүүлэх болно гэв. Мөн хил дамжсан малын халдварт өвчний эсрэг тухайлбал, шүлхийн эсрэг хамтран ажиллах боломжтойг тэмдэглэв.

Монгол Улсын санаачилгаар НҮБ-ын Ерөнхий Ассамблейн 76 дугаар чуулганаар 2026 оныг “Бэлчээр ба нүүдлийн мал аж ахуй эрхлэгчдийн олон улсын жил” болгон зарласан. Олон улсын жилийн хүрээнд хэрэгжүүлэх үйл ажиллагааг НҮБ-ын хэмжээнд зохицуулах үндсэн үүргийг НҮБ-ын Хүнс, хөдөө аж ахуйн байгууллага хүлээн хэрэгжүүлж байна. Олон улсын жилийн Удирдах хороог Монгол Улс даргалж буй. “COP17” болон “Бэлчээр ба нүүдлийн мал аж ахуй эрхлэгчдийн олон улсын жил” нь нүүдлийн мал аж ахуй эрхлэгчдийн үнэлэмж, ач холбогдлыг олон улсын түвшинд хүлээн зөвшөөрсөн байдлыг урт хугацааны бодлого, хөрөнгө оруулалт, бодит үйл ажиллагаа болгоход чухал боломж нээж өгч буй юм.

Санхүүгийн зохицуулах хороо НҮБ-ын Цөлжилттэй тэмцэх тухай конвенцын Талуудын 17 дугаар бага хурал (UNCCD COP17)-ын хүрээнд “Тогтвортой санхүүжилтийн тогтолцооноос хөрөнгө оруулалт руу: Олон улсын хөгжлийн санхүүгийн байгууллагуудтай хамтран ажиллах нь – Монгол Улсын туршлага, сургамж” сэдэвт арга хэмжээг өнөөдөр /2026.08.24/ зохион байгууллаа. Тогтвортой санхүүжилтийн тогтолцоог хөрөнгө оруулалтын бодит боломж болгон хөгжүүлэх, хувийн хэвшлийн оролцоог нэмэгдүүлэх, олон улсын санхүүгийн байгууллагуудтай хамтын ажиллагааг өргөжүүлэх зорилготой тус арга хэмжээний үеэр Санхүүгийн зохицуулах хороо, Олон улсын санхүүгийн корпораци (ОУСК), Монголын тогтвортой санхүүжилтийн холбоо (ТоС Холбоо)-ны төлөөлөл оролцсон панел хэлэлцүүлгийг өрнүүлэв.

Хэлэлцүүлгээр тогтвортой санхүүжилтийн бодлого, зохицуулалтын орчныг бодит хөрөнгө оруулалттай уялдуулах, санхүүжилт татах боломжтой төслүүдийг хөгжүүлэх, хувийн хэвшлийн хөрөнгө оруулалтыг хэрхэн нэмэгдүүлэх болон цаашдын хамтын ажиллагааг бэхжүүлэх боломж, арга замын талаар хэлэлцжээ. Түүнчлэн тогтвортой санхүүжилтийг бодит эдийн засаг, хөрөнгө оруулалттай үр дүнтэй холбох, олон улсын хөгжлийн байгууллагуудын санхүүжилт, техникийн дэмжлэгийг нэмэгдүүлэх арга замын талаар санал солилцсон байна. Мөн Тогтвортой банк, санхүүгийн олон улсын сүлжээ (SBFN)-ний төлөөлөл хөгжиж буй зах зээл дэх тогтвортой санхүүжилтийн хөрөнгө оруулалтыг нэмэгдүүлэх олон улсын чиг хандлага, туршлага, сургамжийн талаар танилцуулсан юм.

Хөдөлмөрийн хөлсний доод хэмжээг Засгийн газар, ажил олгогчид болон ажилтны эрх, хууль ёсны ашиг сонирхлыг төлөөлөн хамгаалах байгууллагын тэгш оролцоотой Хөдөлмөр, нийгмийн түншлэлийн гурван талт Үндэсний хороо хэлэлцэн тогтоодог. Ингэхдээ дараах хүчин зүйлсийг авч үздэг.

- Хүн амын амьжиргааны доод түвшин

- Хөдөлмөрийн бүтээмж дундаж цалингийн зохистой харьцаа

- Нийгмийн даатгалын сангаас олгох бүрэн тэтгэврийн доод хэмжээ

- Эдийн засгийн өсөлт, хөдөлмөр эрхлэлтийн түвшин

- Инфляц зэрэг болно.

Монгол Улсад НҮБ-ын Цөлжилттэй тэмцэх конвенцын 17 дугаар хурал буюу “COP17” зохион байгуулагдаж буйтай холбоотойгоор “Эрдэнэс Тавантолгой” ХК-ийн хэрэгжүүлж буй “Сая тонн - Сая мод” хөтөлбөрийг танилцуулж байна. "Эрдэнэс Тавантолгой" ХК Монгол Улсын Ерөнхийлөгчийн санаачилсан "Тэрбум мод" үндэсний хөдөлгөөнд нэгдэж, байгаль орчныг хамгаалах, цөлжилтийг сааруулах болон газрын доройтлыг бууруулах зорилгоор "Сая тонн – Сая мод" хөтөлбөрийг 2030 он хүртэл амжилттай хэрэгжүүлж буй.

Уг хөтөлбөрийн хүрээнд Монгол орны байгаль, цаг уурын онцлогт тохируулан нийт 180 сая модыг гурван бүс нутагт шинжлэх ухааны үндэслэл, судалгаанд тулгуурлан тарьж ургуулахаар ТЭЗҮ батлуулан ажиллаж байгаа аж.

• Говийн бүс 62 сая мод: Төмөр зам, авто замын дагуу хамгаалалтын ойн зурвас байгуулах, загаар ойжуулах.
• Хангайн бүс 82 сая мод: Шилмүүст модоор ойжуулах, төв суурин газрын ногоон бүсийг нэмэгдүүлэх.
• Говь-хээрийн бүс 36 сая мод: Агро ойжуулалтыг хөгжүүлэх.

Бүс нутгийн байгаль, цаг уурын онцлогт тохирсон мод, сөөгийн тарьц, суулгац үржүүлэх өндөр хүчин чадал бүхий хоёр агропарк байгуулж байна.

• Өмнөговь аймгийн Цогтцэций суманд "Эрдэнэс" агропарк (20 га)
• Дорноговь аймгийн Сайншанд суманд "Зүүнбаян" агропарк (30 га)

Мөн "Ногоон зам" төслийн хүрээнд Өмнөговь аймгийн Цогтцэций сумын авто замын дагуу 62.5 га талбайд хамгаалалтын ойн зурвас байгуулж, байгаль орчинд үзүүлэх сөрөг нөлөөллийг бууруулж байгаа гэнэ.

Монгол Улсын Их Хурлын дэд дарга Ж.Бат-Эрдэнэ өнөөдөр /2026.08.17/ Европын Парламентын гишүүн Ондрей Достал тэргүүтэй төлөөлөгчдийг хүлээн авч уулзлаа. Уулзалтын эхэнд Улсын Их Хурлын дэд дарга Европын Парламентын гишүүдийг Монгол Улсад болж буй Цөлжилттэй тэмцэх тухай HYБ-ын конвенцын талуудьн 17 дугаар бага хуралд оролцохоор ирсэнд талархал илэрхийлээд энэ нь хоёр талын парламент хоорондын хамтын ажиллагаанд чухал хувь нэмэр оруулна гэдэгт итгэлтэй байна гэв.

Тэрбээр Европын холбоо, түүний гишүүн орнуудтай нийгэм, эдийн засгийн бүх салбарт үр дүнтэй, харилцан ашигтай хамтын ажиллагааг хөгжүүлэх нь манай улсын гадаад бодлогын тэргүүлэх чиглэлийн нэг гэлээ. Монгол Улсын Үндсэн хуулийн нэмэлт, өөрчлөлтийн дагуу Улсын Их Хурлын ес дэх удаагийн сонгуулийн үр дүнд улс төрийн таван нам, эвслийн 126 гишүүнээс бүрдсэн парламентын талаар Ж.Бат-Эрдэнэ дарга танилцуулаад ялангуяа парламент дахь эмэгтэйчүүдийн төлөөлөл 25 хувьд хүрсэн нь Азид тэргүүлэгч орны нэг болсон гэдгийг онцлон тэмдэглэв.

Түүнлэн хоёр талын харилцааг нийгэм, эдийн засгийн бүх салбарт өргөжүүлэн хөгжүүлэхэд хууль тогтоох дээд байгууллагуудын хамтын ажиллагаа чухал үүрэгтэйг дурдаад өнгөрсөн тавдугаар сард Улаанбаатар хотноо Улсын Их Хурал, Европын Парламентын бүлэг хоорондын ээлжит 18 дугаар уулзалт амжилттай болсныг дуулгалаа.

Мөн өнгөрсөн оны 10 дугаар сард болсон “Монгол Улс, Европын Холбооны Бизнес, хөрөнгө оруулалтын форум”-ын үеэр Европын хөрөнгө оруулалтын банктай 1.0 тэрбум евро хүртэлх санхүүжилт олгох Санамж бичигт гарын үсэг зурсныг Улсын Их Хурлын дэд дарга тодотгоод цаашид энэ хүрээнд худалдаа, эдийн засгийн хамтын ажиллагаагаа эрчимжүүлж, үр дүнд хүргэх нь чухал гэдгийг онцлон тэмдэглэлээ.

Европын парламентын гишүүн Ондрей Достал уулзалтын эхэнд Монгол Улсын Их Хурлын дэд даргыг цаг зав гарган хүлээн авч уулзсанд талархал илэрхийлээд Цөлжилттэй тэмцэх тухай HYБ-ын конвенцын талуудьн 17 дугаар бага хурлыг зохион байгуулахад Европын Холбооноос тусалж, дэмжиж ажилласныг дуулгав.

Тэрбээр Европын Парламент Монгол Улсын Их Хуралтай хамтын ажиллагаагаа эрчимжүүлэх болсонд сэтгэл хангалуун байгаагаа илэрхийлээд ялангуяа нийгэм, эдийн засаг тэр дундаа уул уурхай, барилга, батлан хамгаалах салбарт хамтын ажиллагаагаа өргөжүүлэн бэхжүүлэхэд Европын Холбоо, түүний гишүүн орнууд нээлттэй байгаа гэлээ.

Мөн төлөөлөгчид Монгол Улсын Их Хурал Уур амьсгалын өөрчлөлтийн тухай анхдагч хууль баталсанд талархлаа илэрхийлээд мөдхөн Ойн тухай хуулийн төслөө батална гэдэгт найдаж байна гэв. Энэхүү хуулийн төслийг баталснаар Ойн түншлэлийн тухай Монгол Улс болон Европын Холбоо хоорондын харилцан ойлголцлын санамж бичгийн хүрээнд хэрэгжих хөтөлбөрийг өргөжүүлэх боломжтой гэлээ.

Уулзалтад Улсын Их Хурлын гишүүн, Монгол-Европын аюулгүй байдал, хамтын ажиллагааны байгууллагын Парламентын ассамблейтай харилцах бүлгийн дарга Д.Цогтбаатар оролцов хэмээн Улсын Их Хурлын Хэвлэл мэдээлэл, олон нийттэй харилцах газраас мэдээлэв.

Аж үйлдвэр, эрдэс баялгийн яам өнөөдөр /2026.08.17/ ээлжит шуурхай хуралдаанаа зохион байгуулж, салбарын ажлуудын хэрэгжилт, тулгамдсан асуудлуудыг хэлэлцжээ. Хурлыг Төрийн нарийн бичгийн дарга Б.Дашпүрэв удирдан явуулж, харьяа газар, нэгжүүдийн ажлын гүйцэтгэл, цаг үеийн тулгамдаж буй асуудал, холбогдох мэдээлэлтэй танилцаж, дараах үүрэг даалгавруудыг өгсөн байна. Үүнд:

• Шатахууны түгээлтийг нэмэгдүүлэх, татан авалтыг сайжруулах ажлууддаа онцгой анхаарах, хадгалах савны хэрэгжилт, нэмэлт хэрэгцээт төслүүдээ бэлдэх;
• Газрын тосны хайгуул, олборлолтыг нэмэгдүүлэх, хөрөнгө оруулалтыг дэмжих хүрээнд, аж ахуйн нэгжүүдтэй уулзалт зохион байгуулж, хөрөнгө оруулалт болон олборлолтын хэмжээг нэмэгдүүлэх боломж, арга хэмжээний талаар санал солилцож, хэрэгжилтийг дэмжин ажиллах;
• Уул уурхай, газрын тосны салбарын аж ахуйн нэгжүүдийн үйл ажиллагаа, орон нутгийн хөгжил, эдийн засаг, нийгэмд оруулж буй хувь нэмэр, үр өгөөжийг олон нийтэд зөв, бодитой ойлгуулах зорилгоор богино хэмжээний мэдээллийн контент, шторк бэлтгэн түгээх;
• Сэлэнгэ аймгийн нутаг дэвсгэрт хууль бусаар ашигт малтмал олборлосон, байгаль орчинд сөрөг нөлөөлөл учруулсан байж болзошгүй газруудад хяналт тавьж ажиллах, Байгаль орчин, уур амьсгалын өөрчлөлтийн яамтай хамтран ажлын хэсэг байгуулж, холбогдох хууль тогтоомжийн хэрэгжилтэд хяналт шалгалт зохион байгуулах;
• Цөлжилттэй тэмцэх тухай НҮБ-ын конвенцын талуудын 17 дугаар бага хурал (COP17)-ыг зохион байгуулахтай холбогдуулан Аж үйлдвэр, эрдэс баялгийн яамны хариуцсан чиглэл, хэрэгжүүлэх арга хэмжээний бэлтгэл ажлын явцад хяналт тавьж, хэрэгжилтийг хангах;
• "Бадрах Энержи" компанитай холбоотой ажлын үйл ажиллагааг эрчимжүүлэх;
• Уул уурхайн 7 хоног арга хэмжээний бэлтгэлд анхаарах;
• Цөмийн энергийн тухай хууль, Газрын тосны тухай хууль, Газрын тосны бүтээгдэхүүний тухай хууль зэрэг намрын чуулганаар хэлэлцэгдэх салбарын хууль, тогтоолын төслүүдийн бэлтгэл ажлыг эрчимжүүлэх;
• Эрдэс баялгийн салбар зөвлөлийн хурлыг шуурхай зохион байгуулах, хурлын үр дүнг эргэн танилцуулах;
• Энэ долоо хоногийн Засгийн газрын хуралдаанаар хэлэлцүүлэх асуудлын баримт бичгийг чанартай боловсруулах, холбогдох танилцуулга, мэдээллээр шуурхай хангаж, бэлтгэл ажлыг бүрэн гүйцэтгэх;
• Мөн байгууллагын бусад дотоод үйл ажиллагаатай холбоотой арга хэмжээг авч хэрэгжүүлэх, энэ хүрээнд өгөгдсөн чиглэл, үүргийн хэрэгжилтийг ханган ажиллахыг үүрэг болголоо.

Санхүүгийн зохицуулах хорооны ээлжит 17-р хуралдаан өнөөдөр /2026.08.13/ болж хуулийн этгээдээр бүртгэх, тусгай зөвшөөрөл олгох, хамтын нээлттэй хөрөнгө оруулалтын сан болон хувийн хөрөнгө оруулалтын сан үүсгэн байгуулах, үл хөдлөх эд хөрөнгийн тусгай зөвшөөрөл эрхлэх, даатгалын зуучлагч, даатгалын төлөөлөгчийн үйл ажиллагаа эрхлэх тусгай зөвшөөрөл олгох, нийтэд санал болгон гаргаж байгаа өрийн хэрэгслийг бүртгэх, төлөгдөж дууссан өрийн хэрэгслийг бүртгэлээс хасах, банк бус санхүүгийн үйл ажиллагаа эрхлэх тусгай зөвшөөрлийг хүчингүй болгох зэрэг нийт 22 асуудлыг хэлэлцэн шийдвэрлэлээ.

Хөрөнгөөр баталгаажсан үнэт цаасны тухай хууль, Хорооны 2022 оны 360 дугаар тогтоолоор баталсан “Хөрөнгөөр баталгаажсан үнэт цаас гаргах, бүртгэх, тусгай зөвшөөрөл олгох журам”-д заасан шаардлагыг хангасан хоёр компанид хөрөнгөөр баталгаажсан үнэт цаас гаргах эрх олгож, хамтын нээлттэй хөрөнгө оруулалтын санг үүсгэн байгуулах, хувийн хөрөнгө оруулалтын санг үүсгэн байгуулах асуудлыг хэлэлцэн тус бүр хоёр компанид эрх олголоо.

Мөн төлөгдөж дууссан өрийн хэрэгслийг бүртгэлээс хасаж, “Сүү” ХК-ийн нийтэд санал болгон гаргах 24 сарын хугацаатай, жилийн 16 хувийн хүүтэй, нэг бүр нь 100,000 (нэг зуун мянга) төгрөгийн нэрлэсэн үнэ бүхий 250,000 (хоёр зуун тавин мянга) ширхэг өрийн хэрэгслийг үнэт цаасны бүртгэлд бүртгэхийг зөвшөөрөв. Санхүүгийн зохицуулах хорооны эрх зүйн байдлын тухай хууль, Зөвшөөрлийн тухай хууль, Банк бус санхүүгийн үйл ажиллагааны тухай хуулийн холбогдох зүйл заалтыг үндэслэн банк бус санхүүгийн гадаад валютын арилжаа эрхлэх тусгай зөвшөөрөл болон үйл ажиллагаа эрхлэх тусгай зөвшөөрөл, санхүүгийн факторингийн үйлчилгээ эрхлэх тусгай зөвшөөрлийг тус бүр нэг компанид олголоо.

Түүнчлэн даатгалын зуучлагчийн үйл ажиллагаа эрхлэх тусгай зөвшөөрөл, даатгалын төлөөлөгчийн үйл ажиллагаа эрхлэх тусгай зөвшөөрлийг тус бүр нэг компанид олгохоор шийдвэрлэж, үл хөдлөх эд хөрөнгө зуучлалын байгууллагын үйл ажиллагаа эрхлэх тусгай зөвшөөрлийг хоёр компанид, үнэт металл, үнэт чулуу, тэдгээрээр хийсэн эдлэлийн арилжаа эрхлэх тусгай зөвшөөрлийг хоёр иргэнд олгохоор шийдвэрлэв. Хурлаар Хадгаламж, зээлийн хоршооны тухай хуульд заасан баримт бичгийн бүрдлийн шаардлагыг хангасан нэг хүсэлтийг шийдвэрлэж, орон нутагт хадгаламж, зээлийн үйл ажиллагаа эрхлэх тусгай зөвшөөрлийг олгохоор болов. Хорооны Хяналт шалгалт, зохицуулалтын газраас хэлэлцүүлсэн нэр бүхий компанийн нийтэд санал болгохыг зөвшөөрсөн үнэт цаасны бүртгэлээс хасч, нэг компанийн даатгалын төлөөлөгчийн эрх, нэг компанийн банк бус санхүүгийн үйл ажиллагаа эрхлэх тусгай зөвшөөрлийг тус тус хүчингүйд тооцон шийдвэрлэлээ.

Багахангай-Хөшигийн хөндий-Эмээлт чиглэлийн төмөр замын 110 дугаар километрт байрлах Туул голын 476 метр урт гүүрийн бүтээн байгуулалтын төслийн газарт Монгол Улсын Ерөнхий сайд болон Засгийн газрын холбогдох гишүүд үргэлжлүүлэн ажиллажээ. Төслийн хамгийн томоохон инженерийн байгууламжийн нэг болох уг гүүрийн бүтээн байгуулалтыг “Очир ням” ХХК тэргүүтэй үндэсний таван компани гүйцэтгэж байгаа бөгөөд гүүрийн хойд хэсэгт дам нуруу угсралтын ажил үргэлжилж, нийт 20 дам нуруу тавихаар төлөвлөснөөс одоогийн байдлаар найман дам нурууг угсраад байгаа аж.

Туул голын орчим нь нам дор, хотгор байршилтай бөгөөд хур тунадас ихтэй үед ус хуримтлагдах, голын усны түвшин нэмэгдэх, үерлэх эрсдэлтэй учир гүүрийн суурь, тулгуур болон далангийн ажилд инженерийн нарийн шийдэл шаардагдаж буй гэнэ. Төмөр замын нийт трассын дагуу есөн байршилд 1200 метр урт төмөр бетон гүүрэн байгууламж, ус, мал амьтны гарц болон 127 төмөр бетон хоолой барихаар төлөвлөсөн байна.

Монголбанкны Мөнгөний бодлогын хороо өнөөдөр /2026.08.12/ ээлжит бусаар хуралдаж, бодлогын шийдвэрүүд гаргажээ. Энэхүү шийдвэрийг Монголбанкны ерөнхийлөгч С.Наранцогт, Мөнгөний бодлогын хорооны гишүүн, эдийн засгийн ухааны доктор Р.Даваадорж, СЭЗИС-ийн багш, бизнесийн удирдлагын ухааны доктор Б.Мөнхзаяа нар хэвлэлийн бага хурал хийж танилцууллаа. Мөнгөний бодлогын хорооноос бодлогын хүүг 0.5 хувиар нэмэгдүүлж, 12.5, банкуудын төгрөгийн заавал байлгах нөөцийн хэмжээг 0.5 хувиар нэмэгдүүлж, 14.5 хувьд хүргэх шийдвэр гаргажээ. Энэ оны долдугаар сарын байдлаар улсын инфляц 13 хувьд хүрч өссөн. Монголбанкны ерөнхийлөгч С.Наранцогт “Нийт инфляцын 60 хувийг шатахуун, махны үнийн өсөлт бүрдүүлж байгаа. Шатахуун, махны нийлүүлэлтийн тасалдал инфляцыг тогтворжуулах боломж олгохгүй байна. Махны үнэ тогтворжих, улмаар буурах хүлээлттэй байсан ч шүлхий өвчин гарснаар нийлүүлэлт саарлаа” гэв.

Монголбанкны бодлогын хүүгийн хэмжээ инфляцын хувиас доогуур болчихлоо. Иймээс Төв банкны үнэт цаас дээр байршиж буй мөнгө ам.доллар руу хөрвөх магадлалтай гэсэн болгоомжлол эдийн засагчдын дунд бий. Үүнд Монголбанкны ерөнхийлөгч “Эдийн засгийн өсөлт энэ оны эхний хагас жилд 7.8 хувьд хүрлээ. Өсөлтийг дийлэнхийг уул уурхайн салбарын өсөлт бүрдүүлж байна. Эдийн засгийн бусад сектор дорвитой өсөхгүй байна, зарим нь буурлаа. Тиймээс мөнгөний бодлогыг огцом чангаруулж, мөнгөний нийлүүлэлтийг хумих эрсдэлтэй байна” гэж тайлбарлав.

Мөнгөний бодлогын хорооны гишүүн Р.Даваадорж хэвлэлийн бага хурлын үеэр “Төсөвийн тэлэлт мөнгөний нийлүүлэлтийг нэмэгдүүлж, эдийн засгийн бодит секторыг мөнгөний нийлүүлэлтээр дэмжих боломж олгохгүй явсаар ирсэн. Цаашид төсөв, мөнгөний бодлогын уялдааг хангах арга хэмжээг авах хэрэгтэй. Монголбанк бодлогын хүүгээ нэмээд тоормослоод байхад Засгийн газар төсвөө тэлж, хаазаа нэмээд байж болохгүй” гэсэн байр суурь илэрхийлэв.

Тэгвэл Мөнгөний бодлогын хорооны гишүүн Б.Мөнхзаяа “Мөнгөний нийлүүлэлт 25.8 хувийн өсөлттэй явна. Үүний 20 гаруй хувь нь иргэд, аж ахуйн нэгжийн хадгаламжийн өсөлт. Тэгэхээр мөнгөний нийлүүлэлтийн өсөлт инфляцыг өдөөх нөхцөл болоогүй гэж ойлгох хэрэгтэй” гэж тайлбарлалаа.

Манай орны хэрэглээний голлох валют ам.доллар, юанийн ханш өсөх хандлагатай байгаа. Хэрэв ам.долларын ханш өсвөл импортын бараа, бүтээгдэхүүний үнэ өсөж, инфляцыг нэмэгдүүлнэ. Монгол Улсын гадаад валютын нөөц 7.62 тэрбум ам.долларт хүрсэн. Монголбанкны ерөнхийлөгч С.Наранцогт “Валютын нөөц хангалттай байгаа учраас Монголбанк валютын ханшийг тогтвортой байлгах бодлого баримтална. Энэ онд улсын төлбөрийн тэнцэл ашигтай гаргах хүлээлттэй байна” гэв. Монгол Улсын төлбөрийн тэнцэл энэ оны эхний хагас жилд 567 сая ам.долларын ашигтай гарчээ.