Ezasag.mn

"Эрдэнэс Тавантолгой" компани мэдээллийн аюулгүй байдлын олон улсын стандарт нэвтрүүлж байна

Fri, 10 Apr 2026 14:52:53 +0800

"Эрдэнэс Тавантолгой" хувьцаат компани үйл ажиллагаагаа олон улсын жишигт нийцүүлэх, мэдээллийн аюулгүй байдлын засаглалыг бэхжүүлэх зорилгоор ISO 27001:2022 стандартыг нэвтрүүлэх төслийг амжилттай хэрэгжүүлж байгаа. Өнөөдөр /2026.04.10/ төслийн сүүлийн шат болох удирдлагын дүн шинжилгээний хурлыг зохион байгуулж “Эрдэнэс Тавантолгой" компанийн удирдлагууд болон төслийн баг, зөвлөх баг оролцлоо.

Төслийн зөвлөх үйлчилгээг "Ворлд стандарт консалтинг" ХХК гүйцэтгэж, стандартын дөрвөн бүлэг, 93 хяналтын механизмыг тус компанийн бизнесийн онцлогт нийцүүлэн нэвтрүүлэхэд шаардлагатай баримт бичгүүдийг боловсруулсан юм. Удирдлагын дүн шинжилгээний хурлаар төслийн үр дүнг хэлэлцэж, цаашид кибер аюулгүй байдлыг тасралтгүй сайжруулах стратегийг баталжээ.

Төслийн хүрээнд хийгдсэн онцлох ажлууд:

Мэдээллийн аюулгүй байдлын эрсдэлийн иж бүрэн үнэлгээ хийж, чухал өгөгдөл, активуудыг тодорхойлсон.
Стандартын 2022 оны шинэчлэгдсэн хувилбарын дагуу үүлэн үйлчилгээний аюулгүй байдал (Cloud Security) болон мэдээлэл алдагдахаас сэргийлэх (DLP) хяналтуудыг хэрэгжүүлэх суурийг тавьсан.
Компанийн нийт ажилтнуудын кибер аюулгүй байдлын мэдлэг, хандлагыг дээшлүүлэх сургалт, дадлагуудыг зохион байгуулсан.

Энэхүү стандартыг нэвтрүүлснээр "Эрдэнэс Тавантолгой" ХК нь Монгол Улсын Кибер аюулгүй байдлын тухай хууль болон Хувь хүний мэдээлэл хамгаалах тухай хуулийн хэрэгжилтийг бүрэн хангаж, төрийн өмчит байгууллагуудын мэдээллийн засаглалд жишиг тогтоож байна.

Тээврийн хэрэгслийн даатгуулагчийн эрх ашгийг хамгаалах тогтолцоог сайжруулна

Fri, 10 Apr 2026 14:14:03 +0800

Санхүүгийн зохицуулах хорооны ээлжит 8 дугаар хуралдаан өнөөдөр болж, хуулийн этгээдээр бүртгэх, үнэт цаасны бүртгэлд өөрчлөлт оруулах, тусгай зөвшөөрөл олгох, түдгэлзүүлэх, хүчингүй болгох, бүртгэлийн өөрчлөлт хийхтэй холбоотой нийт 17 асуудал хэлэлцэн шийдвэрлэлээ. Хуралдаанаар даатгалын салбар, тэр дундаа тээврийн хэрэгслийн даатгалтай холбоотой гомдол, маргааны нөхцөл байдлыг хэлэлцэв. Санхүүгийн зохицуулах хороонд ирүүлсэн даатгалын өргөдөл, гомдлын дийлэнх хувийг тээврийн хэрэгслийн даатгалын өргөдөл, гомдол эзэлж байгаа бөгөөд энэ нь зарим даатгалын компанийн гэрээний нөхцөл ойлгомжгүй, хоёрдмол утгатай байгаатай холбоотой аж. Үүнээс шалтгаалж даатгуулагчдыг төөрөгдүүлэх, даатгалын тохиолдлыг үгүйсгэх, нөхөн төлбөр олгохоос татгалзах, хохирлын хэмжээг үндэслэлгүйгээр бууруулах, зарим гэрээг даатгагч талд хэт давуу байдлаар байгуулсан нь иргэд, даатгуулагчдыг хохироох, гомдол маргаан үүсэх шалтгаан болж байгаа гэнэ.

Иймд холбогдох хууль тогтоомжид үндэслэн даатгуулагчийн хууль ёсны эрх, ашиг сонирхлыг хамгаалах тогтолцоог сайжруулах хүрээнд зохицуулалтыг боловсронгуй болгох, холбогдох журмын зохицуулалтад тусгах ажлыг хэрэгжүүлж байгаа талаар танилцууллаа. Хурлаас нийтийн болон даатгуулагчийн ашиг сонирхлыг хамгаалах зорилгоор даатгалын нөхөн төлбөрийг хууль болон гэрээнд заасан хугацаа, хэмжээнд, даатгуулагчид хүндрэл учруулахгүйгээр олгох нөхцөлийг бүрдүүлэх арга хэмжээг шуурхай хэрэгжүүлж, олон нийтэд ил тод мэдээлэхийг ердийн даатгалын бүх компанид үүрэг болголоо. Түүнчлэн нэр бүхий таван даатгалын компанийн төлөөлөн удирдах зөвлөлд тээврийн хэрэгслийн даатгалын гэрээний нөхцөл, үйл ажиллагааг сайжруулах хугацаатай үүрэг даалгавар өгч, хэрэгжилтийг хангахыг даалгалаа. Эдгээр арга хэмжээ нь даатгалын салбарын ил тод, шударга байдлыг нэмэгдүүлж, даатгуулагчийн эрх ашгийг хамгаалахад чухал ач холбогдолтой аж.

Мөн хуралдаанаар хөрөнгөөр баталгаажсан үнэт цаас гаргах үйл ажиллагаа эрхлэх тусгай зөвшөөрлийг хоёр компанид олгохоор, нэг компанийн хувийн хөрөнгө оруулалтын санг үүсгэн байгуулах баримт бичгийг бүртгэхээр, хоёр компанийн хөрөнгөөр баталгаажсан үнэт цаас болон төлөгдөж дууссан өрийн хэрэгслийг тус тус бүртгэлээс хасахаар шийдвэрлэв. Түүнчлэн нэг компанийн банк бус санхүүгийн гадаад валютын үйл ажиллагаа эрхлэх, нэр бүхий хоёр үнэт цаасны компанийн тусгай зөвшөөрлийг тус тус хүчингүй болгохоор шийдвэрлэжээ.

Даатгалын хууль тогтоомыг шинэчлэх ажлын хэсгийн хуралдаан боллоо

Fri, 10 Apr 2026 14:03:54 +0800

УИХ-ын даргын захирамжаар байгуулагдсан “Монгол Улсын даатгалын хууль тогтоомжийн талаар санал, дүгнэлт гаргах, шаардлагатай тохиолдолд холбогдох хууль, тогтоомжийн төсөл боловсруулах” чиг үүрэг бүхий ажлын хэсгийн хуралдаан өнөөдөр Төрийн ордны “Үндсэн хууль” танхимд боллоо. Монгол Улсын даатгалын тогтолцоог хүртээмжтэй, өгөөжтэй, тогтвортой, боловсронгуй болгох зорилготой тус ажлын хэсэг нийгмийн даатгалын хамрах хүрээг нэмэгдүүлэх, эрүүл мэндийн даатгалыг үр өгөөжтэй болгох цаашилбал даатгалын салбарыг илүү өрсөлдөөнтэй, санхүүгийн зах зээлтэй уялдсан, иргэдэд бодит үр өгөөжтэй, эрх зүйн орчныг боловсронгуй болгоход анхаарч ажиллах юм. Түүнчлэн Монгол Улсын нөхцөлд нийцсэн, иргэн төвтэй, ил тод, шударга, эрсдэлд суурилсан шинэ үеийн даатгалын тогтолцоог бүрдүүлэх хүрээнд олон улсын туршлага, стандартыг судалж, дотоодын онцлогт уялдуулан бодлогын санал, дүгнэлт боловсруулах, шаардлагатай хууль, эрх зүйн өөрчлөлтийг санаачлах чиглэлээр ажиллана.

Ажлын хэсгийг УИХ-ын гишүүн М.Мандхай ахалж, бүрэлдэхүүнд УИХ-ын гишүүн Н.Алтаншагай, Н.Батсүмбэрэл, Э.Болормаа болон Санхүүгийн зохицуулах хороо, холбогдох төрийн болон хувийн хэвшлийн байгууллагуудын төлөөлөл оролцож байна. Тус хурлаар Санхүүгийн зохицуулах хорооноос даатгалын салбарын өнөөгийн байдал, тулгамдаж буй асуудал, цаашдын хөгжлийн чиг хандлагын талаар дэлгэрэнгүй мэдээлэл өглөө. Даатгалын салбар нь нийгэм, эдийн засагт эерэг нөлөөг үзүүлдэг, санхүүгийн гол тулгуур салбарын нэг бөгөөд сүүлийн жилүүдэд нийгэм, эдийн засагт эзлэх хувь хэмжээ, гүйцэтгэх үүрэг, ач холбогдол өсөн нэмэгдэж, жилдээ иргэд аж ахуйн нэгж байгууллагуудын 400 гаруй их наяд төгрөгөөр хэмжигдэх үнэлгээ бүхий эрсдэлийг даатгаж байна. Гэхдээ цаашид салбарын хамрах хүрээ, хүртээмжийг нэмэгдүүлэх, тогтвортой байдлыг хангах, даатгалын компаниуд, мэргэжлийн оролцогчдын эрсдэлийн удирдлага, санхүүгийн чадавхыг дээшлүүлэх, илүү мэргэшсэн, ёс зүйтэй салбарыг бий болгож, төлөвшүүлэх, олон улсын чиг хандлага, цаг үеийн шаардлагад нийцсэн, уян хатан бодлого, зохицуулалтын орчныг бүрдүүлэх шаардлага тулгарч байна. Иймд салбарын хууль, эрх зүйн орчныг олон улсын жишигт нийцүүлэн сайжруулах, хөгжлийг дэмжихэд чиглэсэн тодорхой саналуудыг энэ үеэр танилцуулсан юм.

Мөн Монголын даатгалын холбооноос “Даатгалын салбарын хууль эрх зүйн орчинд тулгамдаж буй асуудлууд“ сэдвээр мэдээлэл өглөө. Үүний дараа УИХ-ын гишүүн Н.Алтаншагай, Б.Пунсалмаа, М.Мандхай, Н.Батсүмбэрэл нар оролцогчдоос асуулт асууж, хариулт авлаа. Урт хугацааны даатгалыг хөгжүүлэх, одоо мөрдөгдөж буй хууль эрх зүйн орчин, хэрэглэгчдийн итгэлийг бууруулж буй асуудлуудад дүн,шинжилгээ, зохих судалгааг иж бүрнээр нь хийж, дүгнэлт гаргахаас ажлын хэсэг ажлаа эхлэх нь зөв гэж үзлээ.

Ган үйлдвэрлэлийн цогцолборын олон улсын нээлттэй сонгон шалгаруулалт зарлалаа

Wed, 08 Apr 2026 17:20:15 +0800

Засгийн газрын ээлжит хуралдаан 2026 оны дөрөвдүгээр сарын 8-нд болж дараах асуудлуудыг хэлэлцэн шийдвэрлэлээ.

Эдийн засгаа идэвхжүүлж, компани, аж ахуйн нэгжүүдээ дэмжих зорилгоор 2026 онд төлөвлөсөн төрийн 9376 хяналт, шалгалтыг цуцаллаа

Монгол Улсын Засгийн газраас баталсан 2026 оны нэгдсэн төлөвлөгөөнд 9376 иргэн, аж ахуй нэгж, байгууллагын объектод хяналт шалгалт хийхээр байсныг Засгийн газрын өнөөдрийн хуралдаанаар цуцаллаа. Засгийн газрын хэрэгжүүлж буй “Чөлөөлье” санаачилга бол эдийн засгийн сорилттой энэ цаг үед хянан шалгах гэхээс илүү эдийн засгаа идэвхжүүлэх зорилготой гэдгийг Ерөнхий сайд онцлоод зарим барилгад сард 16 удаа шалгалт очсон байна. Шалгалтынх нь 50 хувь нь торгож байгааг шүүмжлээд төрийн зүгээс үзүүлэх хүндрэл, чирэгдлээс чөлөөлж, бизнес эрхлэх үйл ажиллагаанд дэмжлэг үзүүлж ажиллах ёстой гэлээ. Харин хүний эрүүл мэнд, аюулгүй байдлыг хангах үүргээ төр хэрэгжүүлнэ гэв.

Салбарын хяналт шалгалтын нийт 31 чиглэлийг 11 яам, 3 агентлаг, орон нутгийн захиргааны байгууллага хариуцан хэрэгжүүлж, улсын хэмжээнд нийт 1713 улсын байцаагч 112 хууль, 3600 гаруй дүрэм, журам, 4500 гаруй стандартын хэрэгжилтэд хяналт тавьж ажиллаж байна. 2024, 2025 онд хийсэн шалгалтуудаас харвал нэг байгууллагад жилд 30 гаруй удаа очиж шалгажээ.

Төрийн албан хаагчдыг 20-30 төрлийн тайлангаас чөлөөллөө

Төрийн байгууллагад байгаа 3000 сул орон тоонд хүн нөхөж томилохгүй, царцааж байгааг Ерөнхий сайд Н.Учрал Засгийн газрын гишүүдэд анхааруулаад төрийн албанд халаа, сэлгээ хийхгүй байхыг “Төрийн байгууллагын бүтэц, зохион байгуулалтыг оновчтой болгох, төрийн албан хаагчдын ажлын ачааллыг бууруулах зарим арга хэмжээний тухай” Засгийн газрын тогтоолоор үүрэгжүүлж байгаагаа мэдэгдлээ.

Төрийн албаны 3000 орчим сул орон тоог нөхөх, сэлгэн шилжих үйл ажиллагааг яам, агентлагийн чиг үүргийн шинжилгээ хийгдэж дуусах хүртэлх хугацаанд зогсоож царцаана. Ойролцоогоор 26 яамтай тэнцэх орон тоо, дунджаар 7.4 тэрбум төгрөгийн цалингийн санг хэмнэх ажээ. Төрийн албан хаагчдыг сар, улирал, хагас жил, жил тутам 20-30 төрлийн тайлан, мэдээ бичихээс чөлөөлж, “Once-Only” зарчим буюу ижил агуулга бүхий тайланг нэг удаа гаргадаг болгохоо Ерөнхий сайд Н.Учрал мэдэгдээд буй. Өнөөдрийн тогтоолоор төрийн албан хаагчдаас тайлан нэхэхийг хориглолоо. Төр өөрт байгаа мэдээллийг иргэнээс нэхэхгүй гэж хуульчилсан ч төр мэдээллээ хоорондоо солилцдоггүй асуудал байсаар байна. Иймд хуулийн хэрэгжилтэд анхаарч ажиллахыг холбогдох албан тушаалтнуудад үүрэг болголоо.

Төрийн байгууллагын удирдлага, албан хаагчид "Их өгөгдөлд суурилсан шийдвэр гаргалтыг дэмжих eCabinet dashboard”-ыг хэрэглэх, шаардлагатай мэдээллээ авч байх ёстойг Засгийн газрын гишүүд, яам агентлагийн удирдлагуудад даалгаж Засгийн газрын гишүүд манлайлж ажиллахыг Ерөнхий сайд уриалав. Мөн ажлын цагийн менежментийг уян хатан зохион байгуулах, төрийн албан хаагчдыг амралтын өдөр, бямба, ням гаригт ажиллуулахгүй байх, ажлын таван өдрийн нэг өдрийг цахимаар буюу зайнаас ажиллах зэрэг шийдвэрийг өнөөдрийн тогтоолоор олголоо.

Ган үйлдвэрлэлийн цогцолборын олон улсын нээлттэй сонгон шалгаруулалт зарлалаа

Ган үйлдвэрлэлийн чиглэлээр үйл ажиллагаа явуулдаг дэлхийд тэргүүлэгч улс орон, томоохон аж ахуй нэгж, хөрөнгө оруулагч нарт Ган үйлдвэрлэлийн цогцолбор төсөлд хөрөнгө оруулан хамтран ажиллах урилга, сонгон шалгаруулалтын баримт бичгийг хүргүүлнэ. Сонгон шалгаруулалтыг ирэх сарын 27-ны дотор зохион байгуулна.

Дархан-Уул аймгийн Орхон сумын нутагт нэг сая тонноос багагүй хүчин чадал бүхий Ган үйлдвэрлэлийн цогцолборыг үйлдвэрлэл, технологийн паркийн зарчмаар барьж байгуулахаар ажиллаж байна. Урьдчилсан ТЭЗҮ-ээр нийт хөрөнгө оруулалт 806 сая ам.доллар байхаар тооцоолжээ.

“Монгол Улс дотоодынхоо хэрэгцээг хамгийн багадаа 60-70 хувь хангах хэмжээний хүчин чадалтай гангийн үйлдвэртэй болно. Гангийн үйлдвэрийг барьж ашиглалтад оруулснаар цементийн өртөг хоёр дахин буурна. Барилгын материалын үндсэн түүхий эдийн үнийг бууруулах, импортын хамаарлыг багасгах, 1700 орчим байнгын ажлын байр бий болгох аж үйлдвэрийн төсөл гараанаас гарахад бэлэн болж байна” гэж сайд Г.Дамдинням хэллээ.

Хаваржилтын хүндрэлийг хохирол багатай даван туулах, гамшигт үзэгдэл, ослоос урьдчилан сэргийлэх, бэлэн байдлыг хангах зардлыг Засгийн газрын нөөц сангаас гаргана

Хаваржилтын хүндрэлийг хохирол багатай даван туулах, ой, хээрийн гал түймэр, хүчтэй салхи, шуурга зэрэг байгаль цаг уурын гаралтай аюулт гамшигт үзэгдэл, ослоос урьдчилан сэргийлэх, бэлэн байдлыг хангах хүрээнд улсын нөөцөөс нэн шаардлагатай бараа, материал болон аймаг, нийслэл дүүрэгт газрын тосны бүтээгдэхүүн олгох, тэдгээрийг тээвэрлэн хүргэхэд шаардагдах зардлыг Засгийн газрын нөөц сангаас гаргахаар тогтлоо. Улсын хэмжээнд 2026 он гарсаар нийт 1282 удаагийн аюулт үзэгдэл, осол тохиолдож, 63 хүн амь насаа алдаж, 61 хүн гэмтжээ. Байгаль, цаг уур, улирлын онцлог, шинж чанартай холбоотой хаврын улиралд шар усны үер, ой хээрийн гал түймэр, хүчтэй салхи шуурганд өртөж, иргэд, аж ахуй нэгж байгууллага амь, нас эд хөрөнгөөр хохирох эрсдэлтэй өндөр байдаг.

Цаг уурын байгууллагаас гаргасан мэдээллээр агаарын температурын огцом өөрчлөлт үргэлжлэн ажиглагдах, салхи шуурганы давтагдал ихтэй байх магадлал өндөр байгаа тул ой, хээрийн гал түймэр зэрэг болзошгүй гамшгийн эрсдэлээс урьдчилан сэргийлэхийг Улсын онцгой комисс сэрэмжлүүлж байна.

Зөвлөлдөх зөвлөлийн ээлжит хурал боллоо

Tue, 07 Apr 2026 12:53:35 +0800

“Монгол хүн баялгийнхаа эзэн” зөвлөлдөх санал асуулгыг зохион байгуулах үүрэг бүхий Зөвлөлдөх зөвлөлийн ээлжит хурал боллоо. Хурлаар Үндэсний статистикийн хорооноос гуравдугаар сарын 27-ноос дөрөвдүгээр сарын 03-ны хооронд орон даяар зохион байгуулсан нэг дэх шатны зөвлөлдөх санал асуулгын талаарх танилцуулга болон ирэх амралтын өдрүүдэд болох хоёр дахь шатны санал асуулга, зөвлөлдөх уулзалтын бэлтгэл ажилтай холбоотой мэдээллийг сонсов.

Газрын хэвлийн баялгийн өгөөжийг Үндэсний баялгийн санд төвлөрүүлж одоо ба ирээдүй үеийн иргэн бүрд тэгш, шударга хүртээх, Үндэсний баялгийн сангийн орлогыг нэмэгдүүлэх, хөрөнгийг арвижуулах, зүй зохистой зарцуулах асуудлыг шийдвэрлэх арга замын талаар иргэдтэй зөвлөлдөх, зөвшилцлийг хангах зорилгоор “Монгол хүн баялгийнхаа эзэн” зөвлөлдөх санал асуулгыг зохион байгуулахаар Засгийн газрын тогтоол гарсан. Үүний дагуу Зөвлөлдөх санал асуулгыг зохион байгуулах үүрэг бүхий Зөвлөлдөх зөвлөлийг 9 хүний бүрэлдэхүүнтэйгээр байгуулсан юм.

“Монгол хүн баялгийнхаа эзэн” зөвлөлдөх санал асуулга хоёр үе шаттай зохион байгуулагдаж байгаа бөгөөд хоёр дахь шатны санал асуулга, зөвлөлдөх уулзалт дөрөвдүгээр сарын 11,12-ны өдрүүдэд Төрийн ордонд болно.

Борооны ус зайлуулах шугам хоолойн цэвэрлэгээ үргэлжилж байна

Tue, 07 Apr 2026 12:42:55 +0800

Авто замын борооны ус зайлуулах шугамын хэвийн үйл ажиллагааг хангах, үерийн эрсдэлээс урьдчилан сэргийлэх зорилгоор төлөвлөгөөт цэвэрлэгээний ажлыг үе шаттайгаар зохион байгуулж байна. Тухайлбал, СХД-ийн 8, 9, 18 дугаар хороо, Баянхошуу дэд төв, Жанцан болон Хайгуулчдын гудамжны борооны усны шугамын цэвэрлэгээг хийж гүйцэтгэлээ. Цэвэрлэгээний ажлын хүрээнд шугам хоолойд хуримтлагдсан лаг, хог хаягдлыг бүрэн зайлуулж, ус нэвтрүүлэх чадварыг сайжрууллаа.

Монголбанк дурсгалын зориулалттай алт мөнгөн гулдмай худалдаж байна

Tue, 07 Apr 2026 12:38:51 +0800

Монголбанкны Эрдэнэсийн сангаас олон улсын стандарт, шаардлагыг хангасан алт, мөнгөн гулдмайг бэлэг, дурсгал болон цуглуулгын зориулалтаар худалдаалж байна. Эдгээр гулдмай нь Лондоны Үнэт металийн биржийн итгэмжлэгдсэн үйлдвэрт цэвэршүүлж, гарал үүслийн бүртгэлтэйгээр үйлдвэрлэгдсэн болно. Тус гулдмайнууд нь өндөр сорьцтой, баталгаажсан үнэт металл бөгөөд дараах жинтэйгээр худалдаалагдаж байгаа юм.

Алтан гулдмай: сорьц-999.9, жин -1, 5, 10, 100 грамм
Мөнгөн гулдмай: сорьц -999, жин тус бүр -1 унц, 100, 250, 500 грамм, 1 килограмм

Эдгээр худалдаалж буй дурсгалын зоос, алт болон мөнгөн гулдмайн талаарх дэлгэрэнгүй мэдээллийг erdenesiinsan.mn цахим хуудаснаас авах боломжтой.

Ерөнхий сайд Н.Учрал эхний шийдвэрээрээ 12100 компанийн дансыг нээлээ

Mon, 06 Apr 2026 12:49:44 +0800

Монгол Улсын 35 дахь Ерөнхий сайд Н.Учрал 01 тоот албан даалгавраараа татварын өрийн улмаас хаагдсан 12100 компанийн дансыг сарын хугацаатай нээлээ. Өнөөдрөөс түгжээгүй болсон данснаас зөвхөн орлого оруулах бус зарлага гаргах эрх нээгдсэнээр 12100 компанийн хэвийн үйл ажиллагаанд эергээр нөлөөлнө гэж тооцоолжээ. Эдийн засагт онцгой байдал үүссэн бол ийм арга хэмжээ авч болох Татварын ерөнхий хуулийн зохицуулалтад үндэслэн албан даалгавраа гаргасан юм байна. Зөвхөн УИХ хууль батлах эрхтэй тул татварын хуульд өөрчлөлт оруулна. Харин Засгийн газар хууль хэрэгжүүлэх өөрт байгаа эрх мэдлийнхээ хүрээнд энэ шийдвэрийг өөрчлөлт хүлээлгүй гаргалаа. Ерөнхий сайд Н.Учрал УИХ-д хагас жилээ дүгнээд, төсвийн тодотголтой цуг татварын хуульд оруулах өөрчлөлтөө өргөн барина гэдгээ мэдэгдсэн юм.

Компаниудад үйл ажиллагаагаа сэргээх, татвар төлбөрөө барагдуулах, цалин хөлсөө олгох боломж нээж байна. Татварын өрөөс болж хаагдсан дансыг нээсэн нь зах зээл, эдийн засагт эерэг дохио өгч идэвхжүүлэх зорилго агуулжээ. Ерөнхий сайд Н.Учрал УИХ-ын дарга байхдаа дэвшүүлж батлуулсан хувийн хэвшил, иргэндээ итгэж, төрийн хүнд суртлаас чөлөөлөх “Чөлөөлье” санаачилгаа эхний шийдвэрээсээ хэрэгжүүлж эхэллээ.

"Эрдэнэс Тавантолгой" нэгдүгээр улиралд 9.5 сая тонн нүүрс боловсруулжээ

Thu, 02 Apr 2026 15:15:48 +0800

“Эрдэнэс Тавантолгой” компани 2026 оны нэгдүгээр улиралд 8.7 сая тонн нүүрс олборлож, 9.5 сая тонн нүүрс борлуулж, нийт 641.6 сая ам.долларын борлуулалтын орлоготой ажиллажээ. Нийт борлуулсан нүүрсний төрлөөр ангилбал:

3.9 сая тонн нь коксжих нүүрс;
3.6 сая тонн нь сул коксжих нүүрс;
1.5 сая тонн нь эрчим хүчний нүүрс;
0.6 сая тонн нь угааж баяжуулсан бүтээгдэхүүн борлуулав.

Экспорт 2026 оны нэгдүгээр улиралд 9.5 сая тоннд хүрч, өмнөх оны мөн үеийнхээс экспортын хэмжээнээс 56 хувиар өссөн байна. Үүний 51 хувь буюу 4.9 сая тонн нүүрс нь хүргэж өгөх нөхцөлтэй биржийн экспорт, 49 хувь буюу 4.6 сая тонн нүүрс нь урт хугацаат буюу ам нөхцөлтэй гэрээний нүүрс эзэлсэн аж.

Гадаад валютын нөөц 7.19 тэрбум ам.долларт хүрчээ

Thu, 02 Apr 2026 14:48:25 +0800

Монгол Улсын гадаад валютын нөөцийн хэмжээ 2026 оны нэгдүгээр улирлын эцсийн гүйцэтгэлээр 7.19 тэрбум ам.долларт хүрч, оны эхнээс 182.5 сая ам.доллароор өсөн, түүхэн дээд түвшинд хүрчээ. Энэ нь валютын төлбөртэй барааны импортын 8.4 сарын хэрэгцээ, бараа болон үйлчилгээний импортын 5.6 сарын хэрэгцээ, богино хугацаат гадаад өр төлбөрийг 275 хувь тус тус хангах түвшинд буюу олон улсад өргөн ашигладаг нөөцийн хүрэлцээт байдлын шалгуурыг хангаж байгаа аж.